દેવગઢ મહિલા સંગઠનના ઘોઘંબા કલ્સ્ટરનાં આગેવાન સીતાબહેન બારીયા, આઠ વર્ષની બાળકી પિન્કલ અને તેના દાદા

બારા ગામની આઠ વર્ષની પિન્કલ કાળુભાઈ નાયક નામની બાળકીનાં માતા-પિતા, કાકા-કાકી અને દાદીનું અવસાન થયું છે, તેથી તે તેના દાદાના સહારે જીવી રહી છે. પિન્કલની જન્મની નોંધણીનો દાખલો સંગઠને કઢાવી આપ્યો. તેથી તેને પાલક માતા-પિતા યોજના હેઠળ દર મહિને 3000 રૂપિયાની સહાય મળતી થઈ. પરિણામે, તેના દાદાને ખૂબ રાહત અને ટેકો પ્રાપ્ત થયાં છે. જન્મ અને મરણની નોંધણી ન થઈ હોવાથી જુદાજુદા દસ્તાવેજો અને અધિકારો મેળવવામાં સ્થાનિક લોકોને બહુ તકલીફો વેઠવી પડતી. ‘દેવગઢ મહિલા સંગઠન’ અને ‘આનંદી’ દ્વારા સ્થાનિક ગામોમાં દર છ મહિને યોજાતી ‘બાળ-સ્વાચ્ય ઝુંબેશ' દરમ્યાન પણ કાર્યકરોએ બાળકની ઉમર જાણવાની કોશિશ કરી ત્યારે જન્મનો દાખલો ન હોવાની વાત જાણવા મળી. ‘રોજી રોટી લોકઝુંબેશ’ પછી બારીયા તાલુકા મથકે યોજાયેલી જનસુનાવણીમાં સંગઠનના બારા કલ્સ્ટરનાં આગેવાન સીતાબહેને જન્મ-નોંધણીનો મુદ્દો રજૂ કરીને તેનો ઉકેલ લાવવાની માંગ કરી. ઉપરાંત, સીતાબહેને ગ્રામજનોને પણ જન્મમરણની નોંધણી કરાવવા બાબતે જાગૃત કર્યા. સંગઠનના પ્રયાસોથી હવે બારા ગામમાં દર બુધવારે પંચાયત ઑફિસ ખુલવા લાગી છે અને ગ્રામજનો જન્મ-મરણની નોંધણી કરાવવા લાગ્યા છે.