ભથવાડા ગામની આશરે 6000 જેટલી વસતિમાંથી પચાસ ટકા કુટુંબો અંત્યોદય કાર્ડ ધરાવે છે. તેમાંથી અડધા લોકોને જ અનાજ મળતું હતું. મહિનામાં 10-12 દિવસ રાશનની દુકાન બંધ રહેતી અને ખુલે ત્યારે પણ બધાને તેમના હકનું પૂરતું અનાજ આપવામાં આવતું નહોતું. વળી, વાજબી ભાવની દુકાન હોવા છતાં ઘણી વાર તો બજાર ભાવ કરતાં પણ વધુ ભાવે અનાજ મળતું. એટલું જ નહીં, અનાજની ગુણવત્તા પણ સારી નહોતી. ‘દેવગઢ મહિલા સંગઠન’ની સામૂહિક લડતના કારણે હવે ગામના લોકોને નિયમિત રીતે અનાજ મળતું થયું છે. હવે તો દુકાનવાળા ફળિયેફળિયે ફોન કરીને બધાને અનાજ લેવા બોલાવે છે.